Ex-INC Minister Menorca inaresto

INARESTO ang dating Iglesia ni Cristo minister na inakusahan ang sekta ng pagkidnap sa kanya at pagkulong sa kanyang pamilya, nitong Miyerkoles ng mga pulis na naka-plainclothes sa pangunguna ng police superintendent na miyembro ng INC.

Ayon kay Lowell Menorca, patungo siya sa Court of Appeals (CA) para dumalo sa kanyang petition for writs of amparo at habeas corpus nang bigla siyang harangin at kanyang mga kasama sa Roxas Boulevard.

Sinabi ni Menorca, pinatalsik sa INC makaraang akusahan ang mga lider ng powerful sect ng pagdukot sa kanya sa Sorsogon nitong nakaraang taon, isinilbi sa kanya ng sinasabing mga pulis ang warrant of arrest.

“Galing po ako ng safehouse. Papunta ako sa Court of Appeals. Magpapalit po kami ng sasakyan bago pumunta ng Court of Appeals. Pagbabang-pagbaba ko, dinambahan na ako ng naka civilian na nakamotor lang at niyakap na ako at nakipagbuno sa akin at sinabi may warrant daw ako. Pulis daw po siya,” aniya.

Sinabi ni Menorca, ipinakita sa kanya ng mga pulis ang arrest warrant ngunit hindi ipinabasa sa kanya.

Ang iprinesenta aniya sa kanya ay alias warrant, na iniisyu ng korte kapag walang plea na inihain sa asunto.

“Hindi ako naka-attend ng hearing tapos biglang may warrant? Wala akong kamalay malay,” aniya.

‘’Walang ni isang nai-serve sa akin na notice. Walang notice of hearing, bigla akong nagkaroon ng warrant. Paano nangyari iyon?”

Pagkaraan aniya ay dumating ang 20 uniformed cops sa erya para arestuhin siya.