SSS sinisi ni Belmonte

TAHASANG sinisi ni House Speaker Feliciano Belmonte ang pamunuan ng Social Security System (SSS) kung bakit naipasa ang pension hike bill nang wala ang kaakibat na dagdag poder sa SSS board.

Ayon kay Belmonte, napakatahimik ng liderato ng SSS sa panahong tinatalakay ang bill kaya hindi nailakip ang pagbibigay ng kapangyarihan sa board.

Puro subbordinates at legal counsel aniya ang ipinadala ng SSS noon sa mga pagdinig sa pension hike bill.

Dahil dito, hindi naipaliwanag nang husto sa mga kongresista kung gaano kabigat ang magiging epekto nito sa pinansyal na katayuan ng ahensiya.

Kaya nang mapagtibay ng dalawang kapulungan ng Kongreso ang dagdag pensiyon, biglang nagkumahog ang mga opisyal ng SSS dahil hindi na alam kung ano ang kanilang gagawin.