Tserman patay, asawang principal sugatan sa ambush (Sa Cotabato)

PIKIT, NORTH COTABATO – Hindi na umabot nang buhay sa pagamutan ang isang barangay chairman nang tambangan ng riding-in-tandem suspects sa probinsya ng Cotabato kamakalawa.

Kinilala ang biktimang si Pecson Alang Mangansakan, Brgy. Chairman ng Brgy. Silik Pikit North Cotabato, tiyuhin ni Pikit Vice-Mayor Don Mangansakan.

Habang nadaplisan ng bala sa katawan ang maybahay niyang si Marela Mangansakan, principal ng isang paaralan sa bayan ng Pikit.

Ayon kay Cotabato Police Provincial Director, Senior Supt. Alexander Tagum, lulan ang mga biktima sa isang Suzuki multi-cab (temporary plate number 1201-07307) nang biglang sumulpot ang mga suspek at pinagbabaril si Chairman Mangansakan gamit ang kalibre.45 pistola.

Agad tumakas ang mga suspek sakay sa isang motorsiklo patungo sa isang liblib na lugar sa bayan ng Pikit.

Naisugod pa sa Cruzado Medical Hospital si Kapitan Mangansakan ngunit hindi na umabot nang buhay habang nasa ligtas nang kalagayan ang kanyang asawa.

Rido o away pamilya ang natatanaw ng pulisya na motibo sa pananambang sa mga biktima.