Ex-Leyte mayor et al kinasuhan ng graft sa Omb.

TACLOBAN CITY – Nahaharap sa kasong graft sa Ombudsman ang dating alkalde sa bayan ng Mc Arthur, Leyte.

Inihain ang kaso sa Office of the Ombudsman dahil sa ilegal na withdrawal ng P355,000 para sa overtime pay mula taon 2002 hanggang 2004.

Bukod kay dating Mayor Leonardo Leria, pinangalanan din ni Ombudsman Conchita Carpio-Morales ang iba pang haharap sa kasong paglabag sa Section 3 (e) ng Republic Act No. 3019 o Anti-Graft and Corrupt Practices Act, na sina municipal treasurer Daisy Caña, budget officer Arturo Zamoras at accountant Margarita Dagsa.

Ayon kay Morales, ang tatlong iba pang opisyal ang nag-apruba sa pagbayad sa overtime mula sa pera na para sana sa clothing/uniform allowance.

Natuklasan sa ginawang audit, walang nakatalaga para sa overtime services at wala rin supporting documents na awtorisado ang paggamit ng nasabing overtime pay.

Ayon sa DBM Circular No. 10 (1996), ang bawat department heads ay hindi awtorisadong mag-claim ng overtime pay.