Appointments ng CSC, JBC, DFA at AFP off’ls lusot sa CA

LUSOT na sa makapangyarihang Commission on Appointments ang ad interim appointment ni Hon. Maria Milagros Fernan-Cayosa sa Judicial and Bar Council (JBC) bilang kinatawan ng Integrated Bar of the Philippines (IBP).

Makaraang aprubahan ng CA Committee on Justice, wala nang tumutol na mambabatas sa appointment ni Cayosa sa plenaryo.

Pagsisilbihan ni Cayosa ang apat taon termino mula Hulyo 9, 2015 hanggang sa Hulyo 8, 2019.

Lusot na rin sa CA ang ad interim appointment ni Hon. Alicia Dela Rosa-Bala, bilang chairperson ng Civil Service Commission, kapalit ni Francisco Doque III.

Naaprubahan din ang appointment ng 16 opisyal ng Department of Foreign Affairs (DFA), kabilang sina Amb. Jesus Domingo ng New Zealand, Minda Calaguian-Cruz ng Australia at Eduardo Jose De Vega ng Vietnam.

Pinagtibay ng CA ang promosyon ng 77 opisyal ng Armed Forces of the Philippines na may mga ranggong colonel, major general at brigadier general.