Modernong full body scanner nasa NAIA na

Sinubukan kahapon ang makabagong full body scanner na gagamitin ngayong buwan bilang bahagi ng pagpapalakas ng seguridad sa lahat ng terminals ng Ninoy Aquino International Airport (NAIA).

Ang P149.5-million scanner, EQO portal system, na ilalagay sa final security screening checkpoints ng NAIA, ay isang uri ng teknolohiya na nakikita ang anumang bagay na nakatago sa katawan ng tao.

Ayon sa Manila International Airport Authority (MIAA), ligtas sa mga buntis at yung mga taong may mga body implants dahil napakababa ang radiation nito.

Kabilang sa mga made-detect ng body scanner ay ceramics, liquids, metals, narcotics at explosives.

Kailangan lamang pumihit ng 360 degrees ang pasahero sa open booth ng EQO portal para ma-scan ang buong katawan nito upang makita sa monitor ng scanner kung mayroong kakaibang bagay sa katawan ang isang tao.

Hindi na kailangan pang kapkapan ang mga individual na papasok sa loob ng terminal dahil sa bungad pa lang pinapayuhan na silang tanggalin ang anumang mga bagay na dala nila. 

Siniguro rin ng MIAA na hindi makaaapekto sa privacy ang naturang body scanner.

Dagdag ng MIAA, tatlong units ng scanner ang mapupunta sa Terminal 1; limang units sa Terminal 2; limang units sa Terminal 3; at isang unit sa Terminal 4.

Nasimulan ang bidding nito noong Pebrero 2013 naigawad sa Defense & Protection System (Phil), Inc., noong Nobyembre 2014 ang total bid na P149,554,720.