Presidente ng homeowners itinumba

PINAGBABARIL hanggang mapatay ang presidente ng homeowners association ng hindi nakilalang armadong suspek sa Taguig City kahapon.

Namatay noon din ang biktimang si Datu Abdul, 56, ng 71 Maguindanao St., Purok 3, Brgy. New Lower Bicutan, pangulo ng Lot Association sa C-6, Brgy. Napindan, Taguig City.

Si Abdul ay tinamaan ng mga bala ng M-16 armalite rifle sa iba’t ibang parte ng katawan .

Base sa isinumiteng report kahapon ni Taguig City Police chief, Sr. Supt. Arthur Felix Asis sa tanggapan ni Chief Supt. Henry Ranola, district director ng Southern Police District Office (SPDO), nangyari ang pamamaril dakong 8:50 a.m. sa Maguindanao St., IRM, Brgy. New Lower Bicutan.

Habang nakatayo ang biktima sa lugar, biglang sumulpot ang suspek na nakasakay sa motorsiklo at pinaulanan ng bala ng armalite si Abdula.

Patuloy ang follow-up operation ng pulisya kaugnay sa insidente at inaalam ang pagkakakilanlan ng suspek.