Malinis na eleksiyon

ANG 2016 presidential elections ay inaasahan ng taumbayan na magiging malinis, tapat at  tahimik. Ang tagumpay ng pambansang halalan ay hindi lamang responsibilidad ng Commission on Elections (Comelec).

Mapagtatagumpayan ito nang lubusan kung mismong ang taumbayan ay makikialam.

Habang papalapit ang nakatakdang eleksiyon, ang pambatong kandidato sa pagkapangulo ng bawat partido politikal ay halos tukoy na, at sa mga susunod na araw, ang kani-kanilang running mate ay inaasahang papangalanan na rin.

Ang eleksiyon ay isang gawaing politikal, bahagi ng demokrasyang tinatamasa ng bawat Filipino. Karapatan ng bawat Filipino na makilahok at makapaghalal sa pamamagitan ng isang malinis at walang dayang halalan.

Sa pamamagitan ng isang may kredibilidad na eleksiyon, ihahalal ang kandidato na siyang mamumuno para sa layuning maging matagumpay ang ating gobyerno.

Maisasakatuparan ang ganitong mithiin kung magiging mulat at mapagbantay ang bayan sa darating na 2016 presidential elections.  Ang lahat ng election watchdog ay kailangan din magtulong-tulong para hindi na maulit ang mga pandarayang nangyari noong mga nakaraang halalan.

Ang ihahalal na bagong mamumuno ng bayan ay nakasalalay sa boto ng taumbayan. Magtulong-tulong tayo para sa isang malinis at may kredibilidad  na eleksiyon.