Low pressure sa West PH Sea bagyo na

MAPAPABILIS na ang pagpasok ng tag-ulan nang maging tropical depression o mahinang bagyo ang low pressure area (LPA) na namataan sa West Philippine Sea.

Ngunit ayon sa Pagasa, nasa labas ito ng Philippine area of responsibility (PAR) kaya hindi bibigyan ng local name.

Papalayo rin ito sa kalupaan ng ating bansa kaya hindi dapat na ikabahala.

Gayonman, maaari nitong mahatak ang hanging habagat na siyang magiging hudyat ng pagsisimula ng tag-ulan.

Samantala, ang LPA na nakita kamakalawa sa silangang bahagi ng Bicol region ay tuluyan nang nalusaw.

Ngunit maaari pa rin itong magdulot ng mga pag-ulan sa malaking bahagi ng ating bansa.

Bukod sa dalawang LPA, may isa pang namumuong sama ng panahon ang inaasahang magde-develop sa silangan ng Mindanao.