Higit 34-K residente apektado ng Mt. Bulusan

UMABOT na sa mahigit 34,000 residente ang naapektuhan ng ibinugang abo ng bulkang Bulusan sa lalawigan ng Sorsogon.

Ayon sa National Disaster Risk Reduction and Management Council (NDRRMC), nasa 6,884 pamilya o katumbas ng 34,280 residente ang naapektuhan sa limang bayan sa Sorsogon na kinabibilangan ng Barcelona, Bulusan, Irosin, Casiguran at Juban.

Mula Hunyo 17, nasa walong paaralan na ang nagsuspinde ng klase ngunit tatlo na sa mga ito ang bumukas muli na kinabibilangan ng Inlagadian Elementary School, San Roque Elementary School sa Bulusan, at ang elementary school sa Irosin.

Habang suspendido pa rin ang Bacolod Elementary at High School, Catanusan Elementary School, Puting Sapala Elementary School at Buraburan Elementary School sa bayan ng Juban.

Magugunitang nitong Sabado ay may namataang panibagong abo na ibinuga ang bulkan.

Ayon kay Phivolcs Dir. Renato Solidum, mas mataas at mas makapal ang abong ibinuga ng bulkan kompara sa mga nakalipas na explosion.

Sinundan pa ito ng apat na volcanic earthquake.