20 bahay natupok sa Quiapo

UMABOT sa 20 bahay ang natupok habang 40 pamilya ang naapektuhan sa naganap na sunog sa Brgy. 391, Gonzalo Puyat St., Quiapo, Manila nitong Sabado.

Ayon sa inisyal na imbestigasyon, nagsimula ang sunog sa bahay ng isang Armando Zulueta.

Nabatid na hindi agad naapula ng mga bombero ang apoy.

“May kahirapan kanina dahil sa wind travel. Malakas ‘yung hangin, malakas ‘yung usok dahil sa wooden materials,” paliwanag ni Supt. Crispo Diaz, regional director ng Bureau of Fire Protection-NCR.

Idineklarang fire-out ang sunog pasado 9 p.m.

Ang sunog ay umabot sa ikalimang alarma ngunit walang iniulat na nasaktan sa insidente.

Ilang pamilya na nawalan ng tirahan ang pansamantalang nanuluyan sa barangay hall.