Maraming salamat sa P13-B classrooms project ng PAGCOR (Mabuhay ka Chairman Bong Naguiat!)

UMABOT na nga sa P13 bilyones ang nailaang pondo ng Philippine Amusement and Gaming Corp. (PAGCOR) sa kampanya ng administrasyon ni Pangulong Benigno Aquino III para sa pagpapagawa ng classrooms sa mga public school lalo na roon sa malalayong lugar o probinsiya sa buong bansa.

Ang nasabing proyekto ay kongkretong tugon sa programa ng Department of Education (DepEd) at Department of Public Works and Highways (DPWH).

Sa katunayan, nang i-release ang P3 bilyong karagdagang pondo ay kasabay nito ang inagurasyon ng dalawang bagong school buildings ng Tarlac High School sa Tarlac City na sinaksihan mismo ng Pangulo.

Mukhang sa ilalim ng “Daang Matuwid,” ang PAGCOR ang isa sa mga ahensiyang nakapagde-deliver nang maayos na serbisyo sa mamamayan.

Napakalaking tulong para sa mga kabataan natin sa malalayong lugar at probinsiya ang magkaroon ng silid-aralan para maging komportable sila sa kanilang pag-aaral.

Tiniyak ni Pagcor Chair & CEO Cristino Naguiat Jr., na ang karagdagang pondo ay makatutulong nang malaki para sa mga karagdagang silid-aralan sa malalayong lugar sa ating bansa.

Limang taon na mula nang simulan ng PAGCOR ang nasabing proyekto na tanging guideline ang utos ng Pangulo na tumulong para resolbahin ang batayang suliranin sa sektor ng edukasyon gaya nga ng kakulangan sa mga silid-aralan.

Ayon mismo kay Naguiat, ang P10-bilyon alokasyon na inilaan ng PAGCOR sa nasabing proyekto ay pinakamalaki sa kasaysayan ng ahensiya.

Sa ilalim ng programa, ang DepEd ang tutukoy sa mga public schools at ang DPWH ang magtatayo ng classrooms.

Sa 4,000 classrooms na naitayo na sa inisyal na P7-bilyon pondo, 1,124 rooms sa 230 sites ang kompleto na habang ang iba ay nasa proseo ng konstruksiyon.

Ito ay matatagpuan sa Tawi-Tawi, Sultan Kudarat, Cotabato, Lanao del Sur, Catanduanes, Palawan, Bukidnon, Masbate, Compostela Valley at Bogo City; at Bantayan Island in Cebu.

Umabot na rin sa 1,300 typhoon-resistant classrooms ang naitayo sa mahigit 300 sites na sinalanta ng daluyong na Yolanda. Nagkakahalaga ng P1.6 milyones ang bawat classroom. Mas magastos ito kaysa mga tipikal na silid-aralan dahil typhoon resistant nga.

Bukod sa pagiging typhoon resistant, magastos din umano ang transportasyon ng mga construction materials sa malalayong lugar.

Sa kabila nito, natutuwa ang PAGCOR dahil ang disenyo ng kanilang mga silid-aralan ay mas maluwag. Mataas ang kisame at itinaas rin ang estruktura para huwag abutin ng baha. Bawat silid-aralan ay may 60-estudyanteng kapasidad.

Mabuhay ka, Chairman Bong Naguiat — isa ka sa maipagmamalaking “performing asset” ni Pangulong Noynoy!

DAHIL SA DEMONYONG DROGA DALAWANG BATANG PINOY ANG MAWAWALAN NG ISANG INA

KAHAPON, inaabangan ng sambayanang Pinoy kung matutuloy ang pagbitay sa kababayan nating si Mary Jane Veloso, drug convict sa Indonesia.

Habang inaabangan ang oras ng pagbitay, maraming sector ang kumikilos sa bansa para hilingin na huwag ibitay si Mary Jane dahil naniniwala silang biktima siya ng isang sindikato.

Unang-una na sa mga nakikiusap ang pamilya ni Mary Jane.

Mismong si Pangulong Noynoy (bagama’t marami ang naniniwala na nagpabaya ang gobyerno sa kasong ito) nakiusap kay Indonesian President Joko Widodo na sagipin ang buhay ni Mary Jane at gawin niyang saksi laban sa sinidkati ng droga.

Pabor tayo sa kahilingang ito ni PNoy.

Dahil ‘yang demonyong droga ay talagang maraming pineperhuwisyo.

Ngayon, dahil sa demonyong droga na ‘yan, isang ina ang mawawala at dalawang anak ang kanyang mauulila ganoon din ang kanyang mga magulang at mga kapatid.

Hanggang sa huling sandali, hindi ang sarili ang inisip ni Mary Jane kundi ang kapakanan ng kanyang mga anak at buong pamilya.

Alam nating masakit ang katotohanan sa likod ng pangyayaring humantong sa nakatakdang pagbitay kay Mary Jane.

Pero dapat itong harapin lalo na ng pamahalaan. Dapat magising sa katotohanan ang isang gobyerno na walang maibigay na trabaho sa kanyang mamamayan kaya marami ang nagtatrabaho sa ibang bansa kahit sa illegal na pamamaraan.

Sa nararanasan ngayon ni Mary Jane, hinihiling ng inyong lingkod sa bawat isa na ipanalangin natin si Mary Jane, una sana’y makaligtas siya sa bitay; kung hindi naman, ipanalangin natin ang sinapit niyang kasawian.

God forbids.

Para sa mga reaksiyon, suhestiyon, reklamo at sumbong, magtext sa 0927.590.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com