HATAW! D'yaryo ng Bayan hatawtabloid.com
Tinanghal na “Sprint Champion ang alaga ni Mandaluyong City Mayor Benjamen “Benhur” Abalos matapos pakainin ng alikabok ang mga kalaban sa katatapos na Grand Sprint Championship na ginanap sa bakuran ng San Lazaro Leisure Park sa Carmona,Cavite noong Linggo.
Isang nakapipigil hiningang photo finish na panalo ang naitala ng Tiger Run laban kay Don Albartini sa 1,000 meters na karera.
Ang Tiger Run na bumenta lamang ng mahigit na P10,000 ay pinatnubayan ni Jockey Jonathan Hernandez ay naoras ng 1 minuto laban sa anim pa kalahok.
Sa umpisa ng karera matapos magbukas ang starting gate, agad kinuha ng Tiger Run ang unahan habang pilit na humahabol ang nallamadong Sharpshooter.
Naging mahigpit ang labanan sa unahan ng dalawang mananakbong local subalit hindi bumitaw ang dehadong alaga ni Mayor Abalos. Sa huling 300 meters ay bumitaw na ang Sharpshooter habang paparating naman ang iba pang kalahok na si Don Albartini, Si Senior at Lord of War.
Halos magkasabay na dumating ang dalawa nang tawirin ang finishing line. Sa isang photo finish nanalo ang Tiger Run.
Tumataginting na P600,000 na naiuwing premyo ng Tiger Run, at panibagong tropeo naman ang nakolekta ni Mayor Abalos bilang may-ari ng Sprinter King.
Ni andy yabot
