HATAW! D'yaryo ng Bayan hatawtabloid.com
BIGLANG NABUHAYAN SI MANG PILO NANG MAKITA SI MAJOR DELGADO AT PAPAKYAWIN ANG TINDANG BALUT
May sumutsot sa magbabalut. “Balut!”
Biglang hinto sa paglalakad si Mang Pilo. Paglingon nito, nasa gawing likuran na si Major Delgado na sakay ng minamanehong owner-type jeep.
“Sir!” biglang umaliwalas ang mukha ng magbabalot.”Ilan, Sir?”
“Ilan pa ba ‘yang paninda mo?” ngiti ng opisyal sa pagtatanong.
“Naku, Sir, ‘andami pa… higit sa kalahati pa lang ang naibebenta ko,” kamot sa noo ni Mang Pilo.
“Halika, papakyawin kong lahat ‘yan,” seryosong sabi ni Major Delgado.
“T-totoo, Sir?”
“’Di ako nagbibiro…”
Inimbitahan si Mang Pilo na sumakay sa dyip ng opisyal ng pulis.
“Tayong dalawa ang uubos sa paninda mo,” ngiti uli ni Major Delgado, tumapik sa butuhang balikat ng magbabalut. “Pero dapat, me panulak tayo.”
Pinatakbo ng opisyal ang dalang sasakyan.
“’Wag mo na ‘kong ihatid, Sir,” pitlag ni Mang Pilo sa unahang upuan ng sasakyan.
“’Di pa tayo uuwi…” ang maagap na tugon ni Major Delgado.
Dinala si Mang Pilo ng opisyal sa isang videoke bar. Isang cubicle ang inokupahan ng magkasama. Ang pagtataka ay isinatinig ng magbabalut.
“Ano’ng okasyon, Sir?” anitong walang kakurap-kurap ang mga mata.
(Subaybayan bukas)
Rey Atalia
