Rape cases sa Tacloban lumobo (Makaraan ang Yolanda)

TACLOBAN CITY – Lagpas na sa 60 kaso ng child abuse at rape ang naitala sa siyudad ng Tacloban makaraan ang paghagupit ng Bagyong Yolanda.

Sa nasabing bilang, 31 ang kasong naitala ngayong taon mula Enero hanggang Setyembre at 33 noong nakaraang taon.

Hindi pa kasama rito ang undocumented cases.

Karamihan sa mga biktima ay nasa 10-anyos pababa na inaabuso ng mismong kapamilya.

Isa rito ang 16-anyos biktima na makaraan ang nasabing delubyo, pinilit daw siya ng kanyang nanay na manirahan sa tiyuhing pulis ngunit doon ay naranasan ng menor de edad ang pang-aabuso.

Sa ngayon, nasa ilalim na ng pangangalaga ng social welfare office ang bata habang patuloy na hinahanap ng mga awtoridad ang tiyuhin na na-dismiss na sa serbisyo.

Samantala, inamin ni SPO4 Marissa Monge, hepe ng Tacloban WCPD, posibleng marami pa ang kaso ng pang-aabuso at panghahalay ngunit hindi lang ito nai-report dahil sa eskandalong dulot nito at ang masaklap ay kalimitang suspek ang sariling ama o lolo.

Ang itinuturong rason ay dahil sa mabagal na pagbibigay ng permanent shelters sa Yolanda survivors at nagsasama-sama sa iisang bunkhouse ang aabot sa tatlo hanggang apat na pamilya.

Itinuturong rason dito ng gobyerno ang mahabang proseso ng pagsiguro ng permits para sa backlog sa housing.

Ayon kay Dr. Gloria Fabrigas, head ng Tacloban City Social Welfare and Development Office, tinutulungan nila ang rape victims na maghain ng kaso at nagbibigay sila ng psycho-social support.