3 NPA patay, 2 sundalo sugatan sa enkwentro sa Sorsogon

PATAY ang tatlong miyembro ng New People’s Army (NPA) habang dalawang sundalo ang nasugatan nang magka-enkwentro bago mag-6 a.m. kahapon sa baybaying bahagi ng Brgy. Tinago, Juban, Sorsogon.

Ayon kay Major Angelo Guzman, tagapagsalita ng Armed Forces of the Philippines- Southern Luzon Command, 25 minuto tumagal ang bakbakan ng magkabilang panig.

Agad dinala sa Sorsogon Doctors Hospital ang dalawang nasugatang sundalo na pansamantalang hindi muna pinangalanan.

Narekober ng militar sa pinangyarihan ng sagupaan ang dalawang AK50 rifles, isang kalibre 45 pitsola, dalawang laptop at iba’t ibang equipment.

Naglunsad na ng pursuit operations ang 903rd Infantry Brigade laban sa mga rebelde.