PUJ lumundag sa Lagusnilad 12 sugatan

UMABOT sa 12 ang sugatan, kabilang ang driver, nang mahulog ang isang pampasaherong jeep kahapon ng madaling-araw sa Lagusnilad underpass sa Padre Burgos Drive at Villegas St., Ermita, Maynila.

Ayon sa imbestigasyon ni SPO1 Richard Borbon, imbestigador ng Manila District Traffric Enforcement Unit (MDTEU), naganap ang insidente dakong 3 a.m. sa nabanggit na lugar.

Napag-alaman, ang driver ng jeep (TVY-585) na kinilala lamang sa alyas na Arman, may mga sugat din sa ulo at braso. Siya ay tumakas lulan ng isang pedicab patungong Divisoria.

Sugatan din sa insidente ng konduktor ng jeep na si Bryan Barquin, 29, ng 135 M. Ponce St., Bagong Barrio, Caloocan City.

Kabilang sa mga pasaherong nasugatan sa insidente sina Kennedy Sol, 24,empleyado, ng 105-H Briones St.,7th Avenue, Caloocan City; Aldrin Ubueno, 42, vendor, ng 284 P. Gomez St., 10th Avenue, Caloocan City; at Mary Joy Oriarte, 23, ng 10 Narra St., Diliman ,Quezon City, pawang isinugod sa Philippine General Hospital (PGH).

Ayon kay Barquin, mabilis ang takbo ng jeep at pagsapit sa lugar ay may isang ‘batang hamog’ na tumawid dahilan para iwasan ng driver.

“Kinabig daw sa kaliwa ‘yung manibela hanggang maramdaman nila na gumewang, bumangga muna sa poste at sa puno bago nalaglag nang pataob sa ibabang kalsada,” ayon kay SPO1 Borbon.