P5-M shabu, baril kompiskado sa Sariaya OPS

NAGA CITY – Aabot sa mahigit P5 milyong halaga ng shabu at iba’t ibang uri ng baril at bala ang nakompiska sa tatlong lalaki sa operasyon ng mga pulis sa Brgy. GuisGuis Talon, Sariaya, Quezon kamakalawa.

Kinilala ang mga suspek na sina Reysol Paderon, Roderick Remo, 42-anyos, at Francia Concepcion, 24-anyos.

Ayon sa ulat, naaktohang sumisinghot ng shabu ang mga suspek sa bahay ni Paderon.

Hindi nakapalag pa ang tatlo nang dumating ang mga awtoridad.

Nakuha mula sa kanila ang 219 piraso ng shabu na may timbang na 476 gramo at may street value na P5,236,000.

Bukod sa droga, nakuha rin mula sa sa pag-iingat ng mga suspek ang isang calibre-45, walong magazine, 92 bala ng caliber-45, 33 bala ng caliber-38, drug paraphernalia at perang nagkakahalaga ng P234,000.

Sinasabing matagal nang under surveillance ang tatlo at sa pagkakataong ito ay tuluyan nang napasakamay ng pulisya.

Nakakulong na sa Sariaya Municipal Jail ang tatlo at nahaharap sa kasong paglabag sa Section 12 at 15 ng RA 9165.