Traffic enforcer tigbak sa parak (Nag-agawan sa club dancer)

NAGA CITY – Agad binawian ng buhay ang isang traffic enforcer makaraang barilin ng isang pulis sa Brgy. San Vicente, Pili, Camarines Sur, pasado 2:30 a.m. kahapon.

Kinilala ang biktimang si Albert Bufete, traffic enforcer sa nasabing bayan.

Ayon kay Chief Insp. Chito Oyardo, hepe ng PNP-Pili, kinilala ang suspek na si PO1 Leo Dumangas, nakadestino sa nasabing himpilan.

Nabatid na umiinom sa isang resto bar ang biktima habang naroon din ang suspek nang magkaroon sila nang hindi pagkakaunawaan.

Alegasyon ng suspek, nakita niyang akmang bubunot ng armas ang biktima kung kaya inunahan niya nang paputukan.

Tinaman ng bala ng baril sa balikat at ulo ang biktima na naging daan ng agarang kamatayan.

Pinaniniwalaang nag-away ang biktima dahil sa star dancer ng bar na kinilala lamang sa pangalang Myla.

Nakakulong na si Dumangas habang patuloy na iniimbestigahan ng pulisya ang insidente.