4 bilanggo sa SoCot jail bigong pumuga

KORONADAL CITY- Apat bilanggo sa South Cotabato Provincial Jail sa Brgy. GPS, lungsod ng Koronadal ang nagtangkang tumakas sa pamamagitan ng pagtalon sa mataas na bakod ng nasabing piitan pasado 10 a.m. kahapon ngunit nabigo sila.

Dalawa sa nagtangkang tumakas ay kinilalang sina Jeffrey Cabrera, residente ng bayan ng Polomolok, may kasong robbery, at Jonathan Camdong, residente ng Maguindanao, nakompiskahan ng pampasabog at patalim, nakatalon sa mataas na pader ngunit hinabol at nahuli ng jail guards.

Habang napigilan sa pagtalon ang dalawa pang mga preso na sina Reymark Bersola, may kasong robbery with use of force, at Jay-ar Tipito, may kasong robbery with homicide.

Magkakasama sa isang selda ang apat na bilango at nagplanong tumakas nitong Linggo dahil araw ng dalaw at abala ang iba pang preso at jail guards.

Pinagdugtong-dugtong nila ang kanilang mga kumot at nilagyan ng bakal sa dulo at ito ang ginamit upang makaakyat sa mataas na pader para makatalon sa mga palayan sa likod ng piitan.