Suicide ng estudyante ipinabubusisi ng DepEd

KORONADAL CITY – Agad iniutos ni Deped-12 Regional Director Allan Farnazo kay Superintendent Rommel Flores ng Tacurong City Division, na imbestigahan o alamin ang nangyari kay Princess, ang Grade-8 pupil ng Tacurong National High School na nagtangkang magpakamatay.

Ang biktima ay nasa ICU ngayon makaraang ma-expel sa paaralan.

Ayon kay Farnazo, agad ipatatawag ang guro upang alamin ang ginawa niyang proseso sa pag-expel sa biktima hanggang humantong sa tangkang pagkitil sa kanyang buhay.

Kasabay nito, ipinangako ni Farnazo na ano man ang magiging resulta ng imbestigasyon ay bibigyang importansiya ang kapakanan ng estudyante.

Ang guardian ng bata ang tumutulong sa pagpapaaral sa biktima.

Nais ng pamilya ng biktima na mag-imbestiga ang DepEd upang malaman ang totoong nangyari at hindi na maulit pa.

Umaaasa rin sila na magsilbing leksiyon ang pangyayari sa lahat ng mga mag-aaral.

Masama ang loob ng pamilya ni Princess dahil nagmakaawa na sila para makabalik sa pag-aaral ang biktima ngunit hindi pinagbigyan nang nabanggit na guro.