‘Top Secret’ ng PH ipinakita ni PNoy kay Poe

KINOMPIRMA ni Sen. Grace Poe na “Top secret” ang mga dokumentong ipinakita sa kanya ni Pangulong Benigno “Noynoy” Aquino III sa kanilang pag-usap sa Malacañang kaugnay ng nalalapit na halalan.

Ito ang ginawang paglilinaw ni Poe kasabay ng mga ulat na may ipinakitang dokumento ang Pangulong Aquino sa senadora na sinasabing banta kung paano ididiin ang senadora sa isyu ng kanyang citizenship.

Ngunit ayon kay Poe, hindi ‘yan magagawa ng Pangulong Aquino sa kanya sa halip ay “Top secret” ang ipinakita sa kanya.

“Unang-una, hindi po ganoon ang ating Pangulo. Sasabihin ko na po sa inyo—ang dokumentong ipinakita po ng ating pangulo, ang nakalagay ay Top Secret, wala po itong kinalaman sa pagtakbo o hindi pagtakbo sa 2016,” wika ni Poe.

Ito raw ay may kinalaman sa national security issues na ibinahagi ng Pangulo sa kanya upang mapaghandaan sakaling maupo na siya sa ehekutibo.

Binanggit ng senadora kung paano ito sinabi sa kanya ni Aquino.

“Grace, bibigyan kita ng background, ng iba’t ibang case studies, para malaman mo at maintindihan kung anong mga suliranin ang hinaharap ng isang pangulo kung saka-sakaling ikaw ang naririto,” wika daw ng Pangulo kay Poe.

Magugunitang hinimok ng Liberal Party si Poe na maging ka-tandem ni DILG Sec. Mar Roxas sa darating na halalan ngunit hanggang ngayon ay hindi pa raw nakapagpapasya si Poe.