Mother Lily at Alfie, nagkasagutan

NAGULAT ang karamihang invited na entertainment press sa presscon ng Somebody To Love ng Regal Films at birthday celebration na rin ng Regal Matriarch na si Mother Lily Monteverde noong Huwebes ng tanghali sa Imperial Palace Suits.

Paano’y nagkasagutan sina Mother Lily at manager/columnist na si Alfie Lorenzo. At ang pinagtatalunan nila ay ukol sa director ng Somebody To Love na si Jose Javier Reyes. Tila galit si Tito Alfie kay Direk Joey dahil naman sa kanyang alagang si Judy Ann Santos.

Dahil doon, may mga nasabing hindi maganda si Tito Alfie ukol kay Direk Joey na siyang ikinasama na ng loob ni Mother Lily. Nagpalitan ng maaanghang na salita ang dalawa. Hindi na namin babanggitin kung ano-ano iyon dahil ayaw na naming ma-stress. (Nakaka-stress din kasi ang may nag-aaway sa paligid kahit hindi ka naman kasali). Natapos lamang iyon nang pakiusapang lisanin na ni Tito Alfie ang hotel.

Humingi naman ng paumanhin si Mother Lily sa entertainment press matapos tagurian ni Tito Alfie ang mga press bilang mga ‘pulubi’. Nagpasalamat si Mother Lily sa mga tulong na ibinibigay sa kanya ng press para mai-promote ang kanyang mga pelikula. Iginiit ni Mother Lily hindi niya mararating ang kasalukuyang estado sa buhay kung wala ang tulong ng press.

ni Maricris Valdez Nicasio