Alwyn, makakalaban ang mga totoong boksingero

ni Maricris Valdez Nicasio

HINDI dapat palagpasin ng mga boxing fan ang mga susunod na episodes ng Beki Boxer dahil sasabak na si Alwyn Uytingco sa ring ng professional boxing.

Matapos magtagumpay si Coach Dalmacio (John Regala) sa kanyang masasamang plano sa pamilya ni Rocky Ponciano (Alwyn), mapipilitan si Rocky na agad sumabak sa mas palaban at mas komplikadong mundo ng professional boxing. At kahit pa mas nalalapit si Rocky sa kanyang misyon na maging isang world-class champion boxer, mas titindi naman ang mga pagsubok kakaharapin sa panibagong yugto ng kanyang boxing career.

Kilala bilang ‘The Tsunami’ sa mundo ng Beki Boxer dahil na rin sa kanyang signature tsunami punch, makakaharap ni Rocky ang real-life boxing legend at WBC Silver World Champion  Denver “The Excitement” Cuello.

Si Cuello, 27, ay may record na 33 wins na 21 dito ay knockouts. Gaganap ang Ilonggo boxing champ bilang Marvin ‘The Hammerhead’ Ortega. Isa lamang si Cuello sa listahan ng mga totoong boksingerong makakaharap ni Alwyn sa ring.

Huwag palampasin ang maaksiyong bakbakan sa Beki Boxer Lunes hanggang Biyernes, 7:00 p.m. bago ang Confessions Of A Torpe sa TV5!