Target sa susunod na taon  
PACKAGE 4 TAXES WALANG ATRASAN

WALANG balak ang pamahalaan na iatras ang balaking pagpapataw ng mga dagdag na buwis para sa susunod na taon.

Sa budget briefing ng Senate Committee on Finance na pinamumunuan ni Senador Sonny Angara para sa 2024 National Expenditure Program (NEP), sinabi ni Finance Secretary Benjamin Diokno, ipagpapatuloy nila ang pakikipagtulungan sa Kongreso para maisulong ang mga pangunahing reporma na mahalaga para sa mabilis na pag-unlad ng ekonomiya.

Kabilang dito ang pagpapasa sa mga natitirang tax reform packages ng nakaraang administrasyong Duterte at mga bagong tax measures sa ilalim ng kasalukuyang Marcos administration.

Ilan sa mga itinutulak na  dagdag na buwis ay ang Package 4 o ang Passive Income and Financial Intermediary Taxation na kinabibilangan ng excise tax sa single-use plastic; rationalization of mining fiscal regime; motor vehicle road users tax; excise tax para sa matatamis na inumin at junkfoods; buwis sa pre-mixed alcohol at VAT sa digital service providers.

Target na aprobahan ngayong 19th Congress ang pitong panukala para sa mga nabanggit na dagdag na buwis bilang suporta sa medium-term fiscal framework.

Ayon kay Diokno, kapag naipatupad ang mga tax measures na ito ay makalilikom ang gobyerno ng P120.5 bilyong dagdag na kita para sa taong 2024.

Kapag nagtuloy-tuloy ay tataas pa ang makokolektang buwis na tinatayang P152.2 bilyon sa 2025 at P183.2 bilyon sa 2026. (NIÑO ACLAN)