HATAW! D'yaryo ng Bayan hatawtabloid.com
BALIK-SESYON ang senado sa ilalim ng 19th Congress 2nd regular session at nanatiling pinangungunahan ni Senate President Juan Miguel Zubiri.
Tanging si Senadora Pia Cayetano ang hindi nakadalo sa pagbubukas ng sesyon ng senado dahil kasalukuyang dumadalo sa FIFA Women’s World Cup na ginaganap sa New Zealand dahil siya ang pinuno ng delegasyon ng Philippine Women’s National Football Team.
Mga simpleng kasuotang Filipiniana at Barong Tagalog ang suot ng mga senador na dumalo sa pagbubukas ng sesyon.
Dumalo rin ang mga kinatawan ng Diplomatic community sa pangunguna ng Papal Nuncio na nasa Filipinas, gayondin din sina dating Senate President Franklin Drilon at Senador Francisco “Kit” Tatad.
Kasama ng mga senador ang kani-kanilang mga asawa, mga anak, kapatid, at magulang sa pagdalo sa sesyon.
Imbes ibida ni Zubiri ang kanyang mga ginawa at nagawa ng kanyang isang-taong adminitrasyon ay isa-isang pinuri ni Zubiri ang bawat senador sa kanilang nagawa at mga ambag sa tungkulin bilang mga halal na mambabatas.
Tinukoy ni Zubiri, kailanman ay hindi tumigil ang senado sa paglilingkod sa taong bayan kahit sila ay nakabakasyon.
Aniya, kahit nakabakasyon ay nagpatuloy ang senado na magsagawa ng imbestigasyon sa mga mayroong kaugnayan sa katiwalian, dininig ang ilang mahahalagang panukalang batas at tumulong sa mga nangangailangang kababayan.
Tiniyak ni Zubiri, sa pagbabalik nila ng sesyon ay lalo pang pagbubutihan ng senado ang kanilang trabaho at titiyaking maipasa ang lahat ng mga panukalang batas na kanilang tinalakay sa LEDAC.
Aminado si Zubiri, bibigyang pansin din ng senado ang ilang mga panukalang batas na itinutulak ng mga senador.
Ngunit kung si Senador Robinhood “Robin” Padilla ang tatanungin, nais niyang muling talakayin ang panukalang charter change, ngunit ayon kay Zubiri hindi ito bahagi ng prayoridad ng senado sa ngayon.
Nagpasalamat ang senador sa ginawang talumpati ni Zubiri na kinilala ang kanilang mga ginawa at trabaho.
Sa pagdalo ng mga senador sa ikalawang State of the Nation Address (SONA) ni Pangulong Ferdinand Marcos, Jr., nagpalit sila ng mga kasuutan mula sa pagbubukas ng sesyon ng senado. (NIÑO ACLAN)
