HATAW! D'yaryo ng Bayan hatawtabloid.com
ARESTADO ang limang hinihinalang miyembro ng Randy Domingo Crime Group sa ikinasang buy bust operation ng Provincial Intelligence Unit sa bayan ng San Mateo, lalawigan ng Rizal, nitong Linggo, 14 Agosto 2022.
Sa ulat ni P/Maj. Joel Custodio, hepe ng Provincial Intelligence Unit (PIU), kinilala ang mga suspek na sina Reden delas Armas, alyas Den-Den, Catherine Niegas, alyas Cathy, Benjie Poliquit, Armin Diaz, at Bernie Doria, pawang mga hinihinalang tulak ng ilegal na droga.
Dakong 2:00 am kamakalawa nang madakip ang mga suspek sa isinagawang drug buy bust operation ng mga awtoridad sa #13 Lambak, Brgy., Guitnang Bayan ll, sa nabanggit na bayan.
Nakatanggap ng impormasyon ang mga awtoridad na ang mga suspek ay sangkot sa gun for hire, gun running at pagbebenta ng ilegal na droga.
Agad nakipag-ugnayan sa PDEA ang Rizal PIU na nagresulta sa pagkakahuli ng limang suspek.
Nakompiska mula sa mga suspek ang 15 transparent plastic sachets ng shabu na may timbang na 50 gramo at tinatayang nagkakahalaga ng P340,000, at mga shabu paraphernalia. (EDWIN MORENO)
