Driver sugatan sa ambush
KANDIDATONG KONSEHAL, 1 PA TODAS

PATAY sa pamamaril ng mga hindi kilalang suspek ang isang kumakandidatong konsehal at ang kanyang kasama sa bayan ng San Simon, lalawigan ng Pampanga, nitong Sabado, 27 Nobyembre.

Kinilala ang mga biktimang sina Rogelio “Jon” Salvador, 42 anyos, kumakandidatong konsehal sa nabanggit na bayan, at kasama niyang si Joel Salvador.

Ayon sa ilang testigo, bumibiyahe ang mga biktima sakay ng sports utility vehicle (SUV) na Chevrolet Trailblazer nang biglang pagbabarilin ang kanilang sasakyan ng mga suspek na lulan ng kasalubong na sasakyan.

Naganap ang insidente sa kahabaan ng San Simon-Baliwag Road sa Brgy. San Miguel habang papuntang Brgy. San Jose ang mga biktima pasado 7:30 am.

Agad namatay ang biktimang si Jon habang binawian ng buhay ang kasama niyang si Joel habang ginagamot sa ospital.

Samantala, sugatan ang isa pang biktimang kinilalang si Arnel Caparas na siyang driver ng sasakyan.

Kaugnay nito, ipinag-utos ni PRO3 Director P/BGen. Matthew Baccay ang masusing imbestigasyon sa kaso para malaman ang motibo sa krimen at kung sino ang nasa likod ng pamamaril. (MICKA BAUTISTA)