Inflation rate ng NEDA mintis sa mataas na presyo ng bilihin

KINUWESTIYON ni Senador Imee Marcos ang hindi pagkakatug­ma ng mataas na presyo ng pagkain sa mga palengke sa iniulat na pagbaba ng inflation rate sa bansa.

Sinabi ni Marcos, pinuno ng Senate committee on economic affairs, dapat tapyas na ang mga presyo ng pagkain dahil malaki ang epekto nito sa pagkalkula ng inflation rate na sinasabing bumaba sa 4.5%.

“Totoo kaya ‘yung sinasabi ng NEDA (National Economic Development Authority) sa inflation rate? Kasi ‘di ramdam sa palengke at grocery,” ani Marcos.

Kinalampag ni Senadora Marcos ang Department of Trade and Industry (DTI) dahil nananatiling mataas ang presyo ng pagkain kahit inalis sa enhanced community quarantine (ECQ) ang Metro Manila at ang apat na karatig probinsiya na nagbubuo sa tinawag na NCR Plus bubble.

Binigyang diin ng mambabatas tila kumu­ku­yakoy na naman ang DTI at papetiks-petiks kaya namamayagpag ang mga mapagsamantalang negosyante.

Isang linggo bago ipatupad ang ECQ noong 29 Marso sa NCR Plus bubble, ang presyo sa palengke kada kilo ng pork liempo ay nasa P320-P370, ang pork kasim nasa P300-P350, ang bangus nasa P130-P185, tilapia nasa P100-P150, alumahan nasa P240-P300, habang ang manok ay nasa P165-P200.

Nitong Biyernes, tumaas ang mga presyo hanggang P420 sa pork liempo, P380 sa pork kasim, P200 sa bangus, P340 sa alumahan, habang pareho pa rin sa tilapia, at bumaba lamang sa P130-Php180 ang manok.

Panawagan ni Marcos, hindi dapat mapako sa pa-update-update lang ng E-presyo o online price monitoring, sa halip mas epektibo kung linggo-linggong gawin ang suprise inspection ng DTI sa iba’t ibang palengke, at kung may lumabag, agad sampolan at hulihin.

(NIÑO ACLAN)