Kelot todas sa boga ng notoryus na tulak  

PATAY ang isang lalaki makaraang makipagkita sa kanyang kaibigan at pagbabarilin ng isang hinihinalang drug personality sa Malabon City, kahapon ng madaling araw.

 

Kinilala ang biktimang si Joben Ortega, 29 anyos, residente sa Gozon Compound, Phase 5, Barangay Tonsuya ng nasabing lungsod sanhi ng tama ng bala sa katawan.

 

Pinaghahanap ang suspek na mabilis na tumakas na kinilalang si Robert Andilab, nasa hustong gulang, residente sa Phase 2 Lupa, Gozon Compound.

 

Batay sa pinagsamang ulat nina P/MSgt. Julius Mabasa at P/SSgt. Ernie Baroy, dakong 3:35 am nang maganap ang insidente sa Gozon Compound.

 

Naglalakad ang biktima sa nasabing lugar para makipagkita sa kaibigan na isang alyas Titang nang biglang sumulpot sa kanyang likuran ang suspek at dalawang ulit siyang pinaputukan na tumama sa katawan.

 

Ayon kay Malabon police chief P/Col. Jessie Tamayao, ang insidente ay nasaksihan nina Renante Alvarez, 45 anyos, at Jeramie Redira, 34 anyos, kapwa pedicab drivers ng Gozon Compound, at kinilala si Andilab na nag-iisang gunman na pumatay sa biktima.

 

Patuloy ang follow-up operation ng Malabon Police Community Precinct (PCP) 8 sa pangunguna ni P/Capt. Carlos Cosme, Jr., upang maaresto ang suspek na kilala umanong tulak ng shabu. (ROMMEL SALES)