HATAW! D'yaryo ng Bayan hatawtabloid.com
NATIMBOG ng mga tauhan ng Manila Police District (MPD) ang holdaper na namaril at malubhang nakasugat sa isang mami vendor, kamakalawa ng gabi sa Baseco Compound, Port Area, Maynila.
Pahayag ng suspek na si Alexander Ogdamina, residente sa Blk.1 Gasangan, Baseco Compound, Port Area, ‘ipapayo niya sa mga biktima ng holdap na ibigay na lang ang mga gamit kaysa mabaril ng holdaper.
Nadakip ang suspek, makaraan ang 24-oras na ipinag-utos ni Mayor Francisco “Isko Moreno” Domagoso, dakong 7:20 sa Block 1 sa Gasangan, Baseco Compound nitong nakaraang Miyerkoles ng gabi.
Pinuri ni Mayor Isko ang mga pulis at binisita sa Gat Andres Bonifacio Medical Center ang biktimang si Samson Bautista, 41 anyos, vendor, residente sa 841 Batang Bayani St., Baseco Compound, Port Area, na nasa maayos nang kalagayan.
Sa pagkakadakip sa suspek, humagulgol ang kaanak ng biktima habang nakayakap na nagpasalamat kay Isko dahil sa mabilis na aksiyon na nagresulta sa paghahatid ng hustisya para sa biktima.
Magugunita, ang insidente ay naganap dakong 1:20 am, nitong 18 Pebrero na nakitang inaabangan ng suspek ang biktima na papauwi mula sa pagtitinda ng pares/ mami gamit ang food cart.
Nang makita ang vendor, bumunot ng baril ang suspek at nilapitan si Bautista saka kinuha ang sling bag nito pero tumangging ibigay.
Dahil dito, pinaputukan ng baril sa leeg ang biktima at saka hinablot ang sling bag at saka tumakas.
Nang makarinig ng putok ng baril ang kaibigan ni Bautista na kasama sa pagtitinda, bigla siyang tumakbo papalayo dahil baka umano siya pagbalingan.
Sasampahan ng kasong robbery, frustrated murder at illegal possesion of firearms ang kahaharapin ni Ogdamina matapos makuha sa kanya ang .357 magnum na ginamit sa pagbaril sa biktina
Ang insidente ay nag-viral sa social media dahil sa ginawa ng suspek sa vendor na nakuha sa CCTV ng barangay sa lugar, habang humingi ng tulong kay Moreno ang mga kaanak ng biktima.
(BRIAN BILASANO)
