Sahod ng PNP, AFP members itataas sa P50K

PINAG-AARALAN ni President-elect Rodrigo Duterte na itaas ang sahod ng mga militar at pulis sa bansa.

Sinabi ni Senator Alan Peter Cayetano, maaaring gawing P50,000 ang sahod ng mga miyembro ng AFP at PNP.

Nais aniya ng Davao City Mayor na tuparin ang naipangako niya noong kasagsagan ng kampanya at umaasa na maisakatuparan bago ang Pasko basta suportado ng Kongreso.

Dagdag ni Cayetano, sakaling gumanda ang lagay ng ekonomiya sa bansa ay isusunod nilang itaas ang sahod ng mga empleyado ng gobyerno.

Kinakailangan kasi ng karagdagang P70 bilyon, P50 bilyon dito ay para sa active personnel habang P20 bilyon ay para sa retired officers, sakaling maipatupad ang nasabing dagdag sahod.

Sinabi pa ng senador, naisumite na nila ang proposal sa incoming presidente at kay incoming PNP chief Ronald dela Rosa para ito ay pag-aralan at kanila itong isususumite sa budget secretary.