Paslit patay sa rape at bugbog ng stepdad (Sariling anak na sanggol nanigas sa gutom)

PATAY ang isang 3-anyos batang babae makaraan halayin at bugbugin ng kanyang stepdad habang namatay rin ang kapatid na sanggol dahil sa gutom sa Calabanga, Camarines Sur.

Naabutan ng mga pulis at social worker ang 5-buwan gulang sanggol na patay na sa tabi ng kanyang inang paralisado na si Catherine Lim sa kanilang bahay.

Habang agaw-buhay ang isa pa niyang anak na si Jennylyn na sa ospital na binawian ng buhay.

Hinala ng mga pulis, gutom ang ikinamatay ng sanggol.

Samantala, nakitaan si Jennylyn ng fracture sa ulo at mga paso ng sigarilyo at bali sa iba’t ibang bahagi ng katawan.

Kuwento ni Lim, madalas silang saktan ng kinakasama niyang si Marlon Estefanio.

Inamin din niyang hinahalay ng suspek si Jennylyn sa harapan mismo niya.

Wala aniya siyang magawa lalo’t paralisado halos ang kalahati ng kanyang katawan makaraan ma-stroke habang isinisilang ang kanyang sanggol.

Dinala na sa Tinangis Penal Farm si Estefanio nitong Martes habang nasa pangangalaga ng pulisya si Lima na hindi pa makontak ang mga kamag-anak.