HATAW! D'yaryo ng Bayan hatawtabloid.com
SA PAMAMAGITAN ng isang usufruct deed, ang lalawigan ng Laguna ay pormal na nakakuha ng lupa para sa itatayong Katarungan Center, isang bagong pasilidad ng hustisya, sa pamamagitan ng seremonyal na paglagda sa isang Deed of Usufruct.
Ang paglagda sa memorandum of understanding (MOU) ay dinaluhan nina Governor Sol Aragones, Vice Governor JM Carait, at OIC Justice Secretary Fredderick A. Vida, kasama ang mga lokal na opisyal at pinuno ng komunidad.
Binigyang-diin ni Gobernador Aragones ang kahalagahan ng proyekto, at binanggit na ang pinakahihintay na hakbangin ay magbibigay-daan sa lalawigan na ganap na magamit ang lupain sa Santa Cruz, Laguna para sa isang pasilidad na magsisilbi sa mga mamamayan ng Laguna.
Binanggit ni OIC Justice Secretary Vida na ang Katarungan Center ay naglalayong magbigay ng accessible at napapanahong hustisya para sa bawat Filipino na humihingi ng tulong sa mga tanggapan ng gobyerno.
Kapag nakompleto na, ang Katarungan Center ay inaasahang magsisilbing sentrong hub para sa mga serbisyong legal at iba pang isyu o usapin kaugnay ng hustisya, na nagpapabilis at nagpapahusay ng access para sa mga residente ng Santa Cruz at karatig baybay ng Laguna. (RODERICK PALATINO)
