HATAW! D'yaryo ng Bayan hatawtabloid.com
WINASAK ng mga ahente ng Philippine Drug Enforcement Agency (PDEA) ang isang drug den na pinamumugaran ng mga durugistang adik sa Barangay Poblacion, sa lungsod ng Baliwag, lalawigan ng Bulacan, nitong Sabado ng gabi, 28 Pebrero.
Humantong ang ikinasang operasyon sa pagkaaresto sa pitong indibiduwal at pagkakakompiska ng pinaghihinalaang shabu na nagkakahalaga P40,800.
Kinilala ng pinuno ng PDEA team ang mga naarestong suspek na sina alyas Gelo, 29 anyos; alyas Ric, 30 anyos; alyas Kel, 32 anyos; alyas Nick, 33 anyos; alyas Enzo, 50 anyos; at ang dalawang babaeng suspek na sina alyas Annie, 47 anyos; at alyas Mitch, 32 anyos.
Nakompiska ng operating team ang halos anim na gramo ng hihinalaang shabu na tinatayang nagkakahalaga ng P40,800; iba’t ibang drug paraphernalia; at marked money.
Ayon sa ulat mula sa PDEA, naaktohan ang mga suspek habang nasa kainitan ang isinasagawa nilang pot session.
Ang mga nahuling suspek ay pansamantalang ipipiit sa kulungan ng PDEA-3 sa Lungsod ng San Fernando, Pampanga.
Isinagawa ang operasyon sa pangunguna ng PDEA Bulacan Provincial Office kasama ang PNP Provincial Intelligence Team Bulacan West Regional Intelligence Unit 3.
Mahaharap ang mga arestadong suspek sa kasong paglabag sa RA 9165 o Comprehensive Dangerous Drugs Act of 2002. (MICKA BAUTISTA)
