HATAW! D'yaryo ng Bayan hatawtabloid.com
ni MICKA BAUTISTA
OPISYAL na tinanggap ni PBrig. Gen. Jess Mendez ang kanyang tungkulin bilang bagong talagang director ng Police Regional Office 3 (PRO3) kapalit ni P/Brig. Gen. Ponce Rogelio Peñones, Jr. sa isang seremonya ng pagsasalin ng katungkulan na pinangunahan ni Chief PNP, Gen. Jose Melencio Nartatez, Jr. sa Kampo Julian Olivas (Camp Olivas) sa Lungsod ng San Fernando, lalawigan ng Pampanga kahapon.
May malawak na karanasan si PBrig. Gen. Mendez sa mga gawain sa intelligence and operations division. Dating nagsilbing Acting Provincial Director at Officer-In-Charge ng Nueva Ecija Police Provincial Office, nagsilbing Senior Executive Assistant sa tanggapan ng chief PNP at naging hepe ng Regional Intelligence Division ng National Capital Region Police Office.
Kabilang sa mga prayoridad ni Mendez sa pagkakatalaga sa Central Luzon ay ang patuloy na kampanya laban sa ilegal na droga, mga hindi awtorisadong baril, ilegal na paggawa ng sigarilyo, at ang pagpapalakas ng mga operasyon laban sa pinaghahanap ng batas.
Aniya, ang PRO3 ay patuloy na susulong sa ilalim ng bandila ng “Pulis Central Luzon” na naghahatid ng Serbisyong Tapat, Mabilis, at Nararamdaman — matatag sa mga operasyon, patas sa mga aksiyon, at tumutugon sa mga pangangailangan ng komunidad.
Samantala, itinalag si P/Brig. Gen. Peñones ay itinalaga bilang Acting Director ng PNP Directorate for Operations, upang pamahalaan ang mga patakaran at estratehiya sa mga operasyon ng PNP sa buong bansa.
