2 Kelot timbog sa pagsikwat ng motorsiklo

DALAWANG lalaking nanalisi ng motorsiklo ang naaresto sa isinagawang operasyon sa Barangay Muzon Proper, City of San Jose Del Monte, Bulacan.

Batay sa ulat ni P/Lt. Colonel Reyson M. Bagain, hepe ng San Jose Del Monte CPS, kinilala ang mga naarestong suspek na sina alyas Kim, 25 anyos, at alyas Arjay, 25, kapuwa residente sa Barangay 187 Tala, Caloocan City.

Sa imbestigasyon, naganap ang insidente kamakalawa, 22 Pebrero 2026 dakong 2:30 ng madaling araw sa parking lot ng isang billiard hall sa Barangay Muzon Proper.

Sinabing ipinarada ng biktima ang kanyang motorsiklo para makipagkita sa kanyang mga kaibigan ngunit sa kanyang pagbalik, nadiskubre niyang nawawala na ang sasakyan.

Sa isinagawang follow-up, habang kinokolekta ng biktima ang CCTV footage sa lugar, nakatanggap siya ng impormasyon mula sa saksi na ang motorsiklo ay naibenta na ng mga suspek.

Agad siyang humingi ng tulong sa SJDM CPS na nagresulta sa agarang pagkaaresto ng mga suspek at pagkarekober ng ninakaw na motorsiklo.

Ang mga suspek ay inabisohan ng kanilang mga karapatang konstitusyonal at dinala sa pagamutan para sa kaukulang medical examination bago isinailalim sa kustodiya ng pulisya.

Ang mga naarestong suspek ay kasalukuyang nasa kustodiya ng SJDM CPS habang inihahanda ang kasong paglabag sa RA 10883 o Anti-Carnapping Act of 2016 na ihahain sa Office of the City Prosecutor. (MICKA BAUTISTA)