HATAW! D'yaryo ng Bayan hatawtabloid.com
KASAMA ang hangarin na muling buhayin ang diwa ng rebolusyong hindi madugo at mapayapang People Power para palakasin ang kasalukuyang laban kontra korupsiyon, bitbit na ngayon ng People Power 40 Kick-Off Concert na gagawin sa Feb. 21 sa Quezon Memorial Circle ang temang “Awit at Aksyon Kontra Korapsyon.”
Ayon sa Mayors for Good Governance (M4GG) at Kaya Natin! ang konsiyertong ito ay naglalayong ipaalala sa mga Filipino na ang pagkakaisa at tapang na nagbalik ng demokrasya sa bansa noong 1986 ay maaaring gamitin ngayon sa paglaban kontra korupsiyon.
“People Power proved that the Filipino people, when united, can stand up to injustice and demand accountability. This concert is a way to honor that legacy while encouraging citizens, especially the youth, to continue the fight for transparency and good governance,” ayon sa mga organizer.
Sa pamamagitan ng event na ito, mapapalakas ang mensahe na ang paglaban sa korupsiyon ay responsibilidad ng lahat ng mga Filipino.
Tampok sa konsiyerto ang ilan sa mga pinakamahusay na performers sa bansa, kabilang sina Ogie Alcasid, Janno Gibbs, Rivermaya, Ice Seguerra, Ebe Dancel, Pio Balbuena, Morobeats, Elmo Magalona, Arkin Magalona, Chelsea Alley, at Over October.
Magbibigay kulay din sa selebrasyon ang mga stand-up comedians na sina Alex Calleja at Red Ollero, Iza Calzado, Bea Binene, at DJ JhaiHo.
Magsisimula ang pre-show sa ganap na 4:00 ng hapon, habang ang main concert ay mag-uumpisa dakong ng 6:00 ng gabi.
