HATAW! D'yaryo ng Bayan hatawtabloid.com
ni ALMAR DANGUILAN
SA BIYERNES pa ang a-trese, pero kahapon, Miyerkoles 11 Pebrero, isang matatawag na freak accident ang naganap sa isang LRT station sa Quezon City — patay ang biktima, isang 23-anyos estudyante ng Philippine Christian University (PCU) — na nakitang nahuhulog mula sa ikatlong palapag ng estasyon at nang lumagpak ay nasagasaan pa ng isang kotse.
Sa ulat ng Project 6 Police Station – Quezon City Police District (PS15-QCPD), naganap ang insidente dakong 10:29 ng umaga nitong Miyerkoles, sa EDSA Fernando Poe, Jr. LRT Station northbound, Barangay Ramon Magsaysay, Quezon City.
Nang matanggap ang impormasyon ng mga tauhan ng PS-15 ay agad na nirespondehan ang nasabing insidente, habang nasa lugar na ang emergency rescue team.
Batay sa imbestigasyon ni P/MSg Romel Bonifacio Militar, nakita ng isang babaeng barker na nahuhulog ang biktimang si alyas Prince, mula sa 3rd floor ng Fernando Poe, Jr. LRT Station sa ground ng EDSA northbound.
Pagkahandusay ng biktima, eksaktong nasagasaan ng humahagibis na MG5 Sedan na minamaneho ng isang 31-anyos lalaking driver.
Sinabing agad huminto ang driver para ipahayag na hindi siya sangkot sa insidente.
Dumating ang mga magulang ng biktima at ayon sa ama, nakatakdang magtapos sa pag-aaral ang anak at walang problemang pang-akademiko.
Ibinahagi niya na nag-usap pa sila ng anak nang umagang iyon at inihatid pa siya sa tarangkahan bago ang insidente.
Patuloy ang imbestigasyon ng pulisya kung tumalon o aksidenteng nahulog ang biktima.
Nireresolba rin ang katanungang paano namatay, sa pagkahulog ba mula sa estasyon ng LRT o sa pagkasagasa ng Sedan.
Bukas, 13 Pebrero, Biyernes, naniniwala man sa pamahiin o hindi, iisa ang dapat tandan: mag-ingat. (ALMAR DANGUILAN)
