Buntis sa barangay bibilangin
Bangkay ng bagong silang na sanggol lumutang sa sapa

LUMUTANG sa isang sapa ang bangkay ng isang bagong silang na sanggol sa lungsod ng Malolos, lalawigan ng Bulacan, nitong LInggo, 8 Pebrero.

Sa ulat na ipinadala kay P/BGen. Ponce Rogelio Peñones, Jr., regional director ng PRO3, napag-alaman na isang concerned citizen ang nag-ulat sa Malolos CPS sa pamamagitan ng isang tawag sa telepono na isang patay na sanggol ang natagpuang lumulutang sa sapa ng Brgy. Caingin, sa naturang lungsod.

Ayon kay P/Lt. Col. Rommel Geneblazo, hepe ng Malolos CPS, natagpuan ng mga nagrespondeng operatiba sa binanggit na lugar ang isang patay na babaeng sanggol na lumulutang sa sapa na nakakabit pa ang inunan at umbilical cord.

Kasunod nito, hiniling sa Bulacan forensic unit na iproseso ang pinangyarihan ng krimen habang ang pulisya ay nakipag-ugnayan sa City Social Welfare and Development Office ng lungsod at sa barangay health worker para magsagawa ng record checking sa lahat ng buntis sa loob ng barangay para sa posibleng pagkakakilanlan ng ina o pamilya ng namatay na sanggol. (MICKA BAUTISTA)