HATAW! D'yaryo ng Bayan hatawtabloid.com
WALA nang buhay ang isang 11-anyos batang lalaki nang matagpuan nitong Lunes, 9 Pebrero, na paupong nakalibing sa buhanginan sa dalampasigan ng Brgy. Tiling, bayan ng Cauayan, lalawigan ng Negros Occidental.
Ayon kay P/Lt. Col. Norberto Barniso, hepe ng Cauayan MPS, natagpuan ang biktima ng isang residenteng napadaan sa lugar kahapon ng umaga.
Ani Barniso, hindi opisyal na naiulat na nawawala ang biktima dahil wala pang 24 oras mula nang humingi ng tulong ang kaniyang pamilya sa publiko sa pamamagitan ng social media kaugnay ng kaniyang pagkawala.
Nabatid na malimit magtungo sa dagat ang biktima upang maglaro kasama ng kaniyang mga kaibigan.
Iniimbestigahan ng mga awtoridad kung may foul play sa pagkamatay ng biktimang Grade 4 pupil.
Nakatakdang isailalim sa awtopsiya ang katawan ng biktima upang matukoy ang dahilan ng kaniyang kamatayan.
