HATAW! D'yaryo ng Bayan hatawtabloid.com
NAKOMPISKA ang hindi bababa sa P12-milyong halaga ng mga substantard na laptop at mga cellphone sa ipinatupad na search warrant ng CIDG Regional Field Unit 3 katuwang ang CIDG Olongapo City Field Unit para sa kasong paglabag sa Article 18(a) ng RA 7394 (Consumer Act of the Philippines) sa Subic Bay Gateway Park, sa lungsod ng Olongapo, lalawigan ng Zambales.
Nadakip sa operasyon ang limang suspek, kabilang ang apat na Chinese nationals, at ang pagkompiska ng mga substandard refurbished electronic devices – 2,400 units ng laptop computers, at 65 units ng iba’t ibang mobile phones, na tinatayang nagkahalaga ng P12,195,000.
Sa ulat na ipinadala kay P.Maj. Gen. Robert Morico II, direktor ng CIDG, kinilala ang mga naarestong Chinese national na sina alyas Yuan, alyas Liu, alyas Liang, at alyas Xiao; at ang Filipinong si alyas Lori, pawang mga empleyado ng kompanya at mga residente sa nabanggit na lungsod.
Inaresto ang mga suspek habang hawak at kontrolado ang mga electronic device, mga aparatong walang kinakailangang clearance mula sa dealer at sa National Telecommunications Commission (NTC).
Wala rin itong sertipikasyon mula sa Department of Trade and Industry (DTI), na ginagawang ilegal ang mga item para sa kalakalan sa ilalim ng mga pamantayan bilang proteksiyon ng mamimili.
Nabatid na binuo at inayos ang mga nasamsam na gadget sa loob ng Subic Bay Freeport Zone, kung saan ang lahat ng operasyon ay mahigpit na inilaan para sa pag-export.
Imbes i-export ang mga produkto, sinadya umanong ilipat ng mga suspek sa lokal na merkado upang maiwasan ang pagbabayad ng wastong buwis at tungkulin, na nagresulta sa malaking pagkalugi sa gobyerno, at paglikha ng hindi patas na kompetisyon na nakaaapekto sa mga lehitimong lokal na negosyo.
Nabatid na walang legal na pag-aproba at awtoridad mula sa National Telecommunications Commission (NTC) upang ibenta ang nasabing mga item sa lokal na merkado.
Kaugnay nito, pinuri ng pamunuan ng CIDG si P/Col. Grant Gollod, regional chief ng CIDG Regional Field Unit 3 at CIDG Olongapo City Field Unit sa pangunguna ni P/Capt. John Wayne Pawingi ang pagsugpo sa mga ilegal na operasyon at ilegal na pangangalakal ng mga nasabing produkto, at ang pag-aresto sa mga suspek. (MICKA BAUTISTA)
