HATAW! D'yaryo ng Bayan hatawtabloid.com
HINDI bababa sa P80-milyong halaga ng ilegal na sigarilyo ang nakompiska ng mga awtoridad sa ikinasang entrapment operation sa Brgy. Prenza 1, sa bayan ng Marilao, lalawigan ng Bulacan, nitong Sabado, 7 Pebrero.
Pinangunahan ni P/Maj. Criz Cataluña ng CIDG Bataan PFU, sa ilalim ng pangangasiwa ni P/Col. Grant Gollod, hepe ng CIDG RFU 3, ang entrapment operation ng magkasanib na elemento ng CIDG Bataan PFU at Marilao MPS sa J1 Industrial Compound, sa nabanggit na barangay kamakalawa.
Nagresulta ang operasyon sa pagkakaaresto ng dalawang dayuhang sangkot sa malawakang pagbebenta at pamamahagi ng mga ilegal na produktong tabako.
Sa ilalim ng Oplan Grasshopper, natuklasan ng mga operatiba ang ilang sasakyan—kabilang ang isang trailer truck at mga closed van—na puno ng maraming ilegal na sigarilyo na nakaimbak sa loob ng bodega na pinatatakbo ng mga suspek.
Ang mga nakompiskang gamit, na binubuo ng iba’t ibang brand ng mga produktong tabako, hindi regulated at misbranded, ay tinatayang nagkakahalaga ng P8,000,000 batay sa daily price index.
Muling pinagtibay ni P/Col. Gollod ang pangako ng CIDG sa paglaban sa ilegal na kalakalan, na aniya’y patuloy nilang hahabulin ang mga grupong kriminal na sangkot sa mga ilegal na operasyon. (MICKA BAUTISTA)
