Pulis ng MPD sumuko sa NBI

SUMUKO sa National Bureau of Investigation-National Capital Region (NBI-NCR) nitong Miyerkoles, 4 Pebrero, si Pat. Joshua Semilla Mendoza ng Manila Police District (MPD), inakusahang nang-rape sa isang alyas Bella na nawalan ng malay sa inuman at dinala sa isang hotel sa Sampaloc, Maynila kamakailan.

Ayon sa NBI, ginawa ni Mendoza ang pagsuko matapos maglabas ng warrant of arrest ang Manila Regional Trial Court Branch 52 sa kasong paglabag sa Article 266-A, Paragraph 1(b) ng Revised Penal Code, na inamyendahan ng R.A. No. 8353 (Rape).

Nakipag-ugnayan ang abogado ni Mendoza sa NBI sa kahilingan na ikustodiya siya ng ahensiya.

Matatandaang nagsampa ng reklamo si alyas Bella hinggil sa ginawa ng pulis simula nang siya ay mawalan ng malay sa isang bar sa Quezon City.

Kasama umano nila ang isa pang pulis, isang opisyal ng barangay at isang babae.

Sa alegasyon, nawalan siya ng malay sa hinalang may inilagay sa kanyang inumin at nagising na lang na nasa loob na siya ng motel kung saan naganap ang sexual assault.

Ang suspek matapos ang insidente ay hindi na nagpakita at idineklarang AWOL sa MPD.