HATAW! D'yaryo ng Bayan hatawtabloid.com
INILARGA na ng mga pangunhaing ahensiya ng pamahalaan ang intelligence network para manmanan ang sinabing dalawang politiko mula sa northern Luzon na itinutong ‘utak’ at financier ng mga ilegal na pabrika ng sigarilyo sa Pampanga.
Inihayag ito ni Interior and Local Government Secretary (SILG) Jonvic Remulla matapos salakayin ang isang bodega sa Mexico, Pampanga kung saan nabisto ang mga sigarilyo, cigarette-making machines, at tax stamps.
Ayon kay Remulla, ang nasabing planta ay nag-o-operate nang walang permit at lisensiya sa buong buwan ng Enero 2026 at nakapagmanupaktura ng P4.5 bilyong halaga ng sigarilyo.
“We suspect there are two northern Luzon politicians behind it. Sila ang masterminds, sila ang financiers,” sabi ni Remulla.
Dagdag niya, kontrolado ng dalawang politiko sa Luzon ang illegal tobacco trading sa naturang lugar. Kasunod nito, patuloy na bineberipika ng mga awtoridad ang impormasyong mayroong 10 iba pang ilegal na pagawaan ng sigarilyo sa iba’t ibang lugar sa bansa.
“This is an international system. Ang intelligence namin dito galing pang Singapore and Indonesia na ginagawa rito, so it is larger than you think,” sabi ni Remulla.
Sinabi ni Remulla, posibleng nagsulputan ang ilegal na pagawaan ng sigarilyo sa bansa dahil sa mataas na tobacco excise tax.
Noong 2024, sinabing nawala ang P30 bilyong kita ng pamahalaan mula sa pagbubuwis dahil sa bentahan ng sigarilyo na hindi ipinagbabayad ng buwis.
“Ginagawa ng pamahalaan ang lahat upang mapilay ang ilegal na operasyon hinggil sa tobacco manufacturing,” ani Remulla. (HATAW News Team)
