HATAW! D'yaryo ng Bayan hatawtabloid.com
DINAKIP sa bisa ng warrant operations ang dalawang Chinese national, kamakalawa ng hapon sa Bacoor City.
Pawang mga walang kaukulang piyansa ang mga naarestong suspek na kinilala bilang alyas Yuan, residente sa Pasay City; at alyas Han, residente sa Parañaque City.
Batay sa ulat na nakalap mula sa tanggapan ni Cavite Provincial Director Police Col Ariel Red, 3:00 pm nang magkasa ng warrant operation ang kaniyang mga tauhan sa Bacoor City Police laban sa dalawang suspek.
Bitbit ng grupo ang warrant of arrest na inisyu ng Presiding Judge ng RTC Branch 14 Nasugbu, Batangas na may petsang 4 Pebrero 2026 at walang inirekomendang piyansa para sa mga kasong Kidnapping for Ransom at Serious Illegal Detention (3 counts).
Sinabi ni PLt. Col. Alexie A. Desamito, hepe ng Bacoor Police, kasama nila sa isinagawang operation ang Anti-Kidnapping Group–Luzon Field Unit (AKG-LFU) na ikinaaresto ng mga suspek.
Sa pagsisiyasat ng pulisya, ang mga suspek ay sangkot sa pagdukot sa dalawang Tsino, Koreano, at isa pang lalaki noong 2 Mayo 2025 sa Nasugbu, Batangas.
Kasalukuyang nakapiit ang mga suspek.
Pinuri ni Col. Red ang kaniyang mga tauhan sa matagumpay kahit delikado ang operasyon.
