HATAW! D'yaryo ng Bayan hatawtabloid.com
SUGATAN ang alkalde ng Barobo, Surigao del Sur at kanyang close-in security detail nang paulanan ng bala ng mga armadong kalalakihan ang sinasakyang behikulo sa highway ng Brgy. Causwagan ng nasabing bayan nitong Martes ng hapon.
Kinilala ang mga biktima na sina Mayor Ronito Martizano, 60 anyos, at security escort nitong si Private First Class Kheven Mark Claridad; pawang may tama ng bala sa kanilang mga balikat.
Sa ulat ng Surigao del Sur Provincial Office (PPO), nangyari ang insidente habang ang alkalde ay lulan ng kaniyang Toyota Hi-Ace van galing sa Sitio Panaraga, Brgy. Gamut patungong kabisera nang mangyari ang pananambang sa Brgy. Causwagan dakong 4:10 ng hapon.
Bigla umanong sumulpot ang isang kulay abong Toyota Vios na may kasama pang backup na dalawang motorsiklo lulan ang mga armadong kalalakihan na nagpaulan ng bala sa behikulo ng alkalde saka mabilis na nagsitakas patungo sa direksiyon ng Agusan del Sur.
Ang pananambang ay matapos ipag-utos ng alkalde ang pagpapasara sa illegal tunnel mining operations na umano’y Chinese ang financier sa Brgy. Tambis, Barobo.
Ipinag-utos ni Police Regional Office (PRO) 13 Director P/Brig. Gen. Marcial Mariano Magistrado IV ang manhunt operation laban sa mga suspect at imbestigasyon sa kaso.
