HATAW! D'yaryo ng Bayan hatawtabloid.com
NAARESTO ng pulisya ang limang indibiduwal kabilang ang isang babae na sangkot sa laganap na pagnanakaw sa mga solar farm sa Nueva Ecija kamakalawa, Pebrero 2, 2026.
Ayon sa ulat mula kay Police Colonel Heryl Bruno, provincial director ng Nueva Ecija PPO, bandang alas-9:00 ng umaga, natuklasan ng isang manggagawa sa solar farm sa Brgy. Puting Tubig, Gapan City, na ang isang bahagi ng bakod na alambre sa paligid ay sapilitang pinutol at ang isang naka-install na solar inverter ay nawawala.
Ang biktima na isang 24-taong-gulang na administrative staff mula sa parehong lungsod ay nag-ulat ng insidente sa Gapan City Police Station (CPS) na agad rumesponde kasama ang nagrereklamo sa pinangyarihang lugar.
Kasunod ng mga nakitang bakas malapit sa nasirang bakod, sinubaybayan at nahuli ng pulisya ang limang suspek na natagpuang may hawak at aktwal na kontrol sa ninakaw na solar inverter, na narekober mula sa sidecar ng isang tricycle na ginamit ng grupo.
Ang mga naarestong indibidwal, na may edad 19 hanggang 52, ay mga residente ng kalapit na mga barangay sa Peñaranda at Gen. Tinio, Nueva Ecija, na binubuo ng apat na lalaki at isang babae.
Ang lahat ng mga naarestong indibidwal ay nasa kustodiya na ngayon ng Gapan CPS, habang inihahanda ang isang kasong kriminal para sa kasong Pagnanakaw laban sa kanila. (MICKA BAUTISTA)
