HATAW! D'yaryo ng Bayan hatawtabloid.com
NAKOMPISKA ng mga operatiba ng PNP-Highway Patrol Group (HPG) Regional Office 3 ang 28 toneladang imported na ‘hot meat’ na tinatayang may halagang P10-milyon sa isang checkpoint sa Sta. Maria, Bulacan nitong Linggo ng umaga, 1 Pebrero.
Ayon sa ulat mula sa PNP-HPG Regional 3, dakong 10:00 ng umaga kamakalawa nang pinara nila ang tatlong reefer van dahil naka-blinker lamang ang mga ito at hindi pa nakasuot ng seatbelt ang mga sakay.
Bigong maglabas ng mga kaukulang dokumento ang driver at helper ng mga reefer van para sa pagbiyahe ng mga karne nang sitahin ng mga tauhan ng PNP-HPG.
Ayon sa mga driver ng mga reefer van, ide-deliver nila ang mga kargang karne mula sa bayan ng Sta. Maria patungong Pulilan, Bulacan.
May naipakita umanong dokumento ang mga suspek ngunit hindi sila sigurado kung ito ay para sa mga karga nilang karne.
Kasalukuyang nasa kustodiya ng PNP-HPG Regional 3 ang tatlong reefer van at mga driver para sa patuloy na imbestigasyon. (MICKA BAUTISTA)
