HATAW! D'yaryo ng Bayan hatawtabloid.com
MAHIGIT sa P2 milyong halaga ng cash, at iba pang mahahalagang ari-arian ang nakulimbat ng tatlong hindi kilalang mga kawatan na nanloob sa tahanan ng 45-anyos Indian national sa Quezon City noong Biyernes ng gabi.
Kinilala ang biktima na si alyas Singh, 45, may asawa, Indian national, businessman, residente sa Haydin St., North Olympus Subdivision, Brgy. Kaligayahan, Quezon City.
Sa naantalang report sa Criminal Investigation and Detection Unit ng Quezon City Police District (CIDU-QCPD), 8:00 ng gabi noong Biyernes, Oktubre 10, nang maganap ang insidente sa loob ng tahanan ng biktima.
Batay sa imbestigasyon ni P/SSg Wilbur S. Ramos, kadarating umano ng biktima, kasama ang isang kaibigang kinilalang si Gora nang sumulpot ang tatlong lalaki na sakay ng kulay itim na Yamaha NMAX at Blue Yamaha AEROX na mabilis na pumasok sa loob ng bahay.
Agad tinutukan ng baril ng mga suspek ang biktima at kasama nito saka mabilis na nilimas ang laptop na nagkakahalaga ng P30,000, mga alahas, cash na P900,000, Motorcycle Honda Click, at 7 cellphones saka tumakas.
Patuloy pa ang imbestigasyon ng pulisya sa insidente. (ALMAR DANGUILAN)
